|
 |
Corteo degli sposi e testamento |
| Testamento 2001 | Martedì 27 febbraio 2001 ore 12.00 |
 Sior Anzoleto Postier |
Concitadini zovini e veci, mofalconesi indigeni e oriundi, paisà,
guagliò, pascalò, come vedè tal balcon stavolta son mi. Parchè, dirè
voi? No xe stà altro che un scambio: lori, ogi doman no i xe più
parchè tanto par cambiar gavemo le elezion anca sto ano e alora ghe
go dito: "andè voi un poco tal giro de aria che cussì cominciè
abituarve" e lori me ga risposto: "prova anca ti almeno una volta a
star lassù cussì te se cave una soddisfazion, parchè, omo, se andemo
vanti cussì ogi doman invesse de sior Anzoleto Postier gavaremo don
Angioletto Pastiera…" Un de lori, che ormai el ga fato le so stagion, al me ga dito: "cio', Anzoleto, mi quasi quasi coro par al Senato. Ti cossa te disi" - " Te fa ben corar, omo!" - "Parché, te pensi che ghe la spunto?" al me fa. E mi: "Te convien corar, omo, parchè se te va pian ora che te rive là i ga sa magnà tut! Va tranquilo, però, parchè par quel che so mi, me par che adiritura i te ga xa trovado al posto. I ga dito che i te mete fra Bossi e Cecchi Gori, parchè tanto i xe …persi anca lori!" Concitadini, ghe semo de novo. Pareva l'altro giorno e invesse fra un par de mesi gavemo de novo anca le elession de la Magnadora Granda. Stavolta dopo la quercia e dopo l'ulivo xe rivada la margherita. E desso speto che dopo l'asinello e dopo l'elefantin, rivi al partito de la cavra, che magnarà tute le erbe e ne molarà zo come petule. |
|
Stavolta no i va più in coriera parchè i ga dito che l'altra
volta i ga vendù poche pignate, anca parchè le iera tute sensa
coverci. Adesso i vol andar in treno e i gaveva pensà de darghe
un color, come quel bianco o quel verde, ma piturado de rosso
ghe pareva bruto. Alora un gaveva proposto de farlo viola. "No,
che porta sfiga" i ga dito "e alora de che color lo femo?" -
"Quasi quasi saria bon farlo violeto come quel de Lourdes,
parchè con tuto quel che gavemo combinà solo un miracolo ne
salva." E i ga anca scelto l'omo giusto parchè, par farne
digerir tuto quel che i ne ga fato parar zo, solo Rutelli i
podeva metar. Anca quei altri però i se difendi, no ben come una
volta, parchè dal "spezzarghe le reni" i xe passadi a macolarghe
i schinchi a le ministre. Concitadini, xe tornada la mucca pazza, no so se xe parchè Bossi xe tornà co Berlusconi, fato sta che la da de mato anca ela. No se pol più magnar niente, anca le mense no xe più quele de 'na volta. Par cossa credè che a scola i fioi se porta la carta igienica, miga parchè no la xe, no, xe che co quel che i magna la ghe servi come tovaiol… Va ben che desso co la scusa che i ga de rangiarse a trovarse i schei le scole serca de sparagnar, ara quel de la Duca d'Aosta, fasendo finta de essar bisiaco e ricordandose de quel che copava simizi col martel, lu che ta la sofita de la scola pareva che al gavesse le zecche, al ghe ga da quatro martelade e xe vegnù zo tut. No xe più le scole de una volta, co le aste e i fileti, adesso xe tuto co l'informatica, cui fail, cui cip e cui bit e dopo no i sa gnanca più come che se scrive. Go visto l'altro giorno un che ga portà al fio a vedar la nave che partiva par l'America e al fio ghe ga dito: "Papà, varda che barca granda! E lù, che l'inglese lo mastiga come i peri coti, al ghe dise, tut content: "Quela xe la CRAUN PRINSESS" - "Papà, come se scrive CRAUN PRINSESS?" e lu: "te sa che des che la vedo meio me par che xe proprio una barca granda!" Cossa volè, ormai anca la cultura mola: prima Goriup, Pascoli xe lì e lì, e la Rinascita xe za andada in aeroporto. Adesso xe tuto su Internet. A proposito, citadini, ve comunico che andemo anca in direta su Internet parchè al mulo, quel de la radio, al ga fato un sito dove che al conta de le robe nostre e come i lo ga ciama? FRIULANDIA! Ma cossa, te son mona, ghe go dito, al me ga risposto che tanto cussì cussì i ne copiava e alora al ghe ga sparagnà la fadiga. Xe proprio cussì parchè la Bisiacaria inventa e quei altri copia: qua ghe son mi e Gorizia ga pensà ben de scavar fora la "Dama Bianca", ma cossa te vol, lori xe provincia e i pol permeterse la Dama Bianca, noi paesani dovemo contentarse, se no i va in biclcleta, dei pedoni neri. Xe vegnù anca quei de Canale 5 a Mofalcon e co i ga visto quanti trasfertisti che sta ta un quartier i ga inventà al GRANDE FRATELLO. Anca noi però dovemo ameter che gavemo copià: visto al successo che ga vudo la colaborassion dei nostri pulisiotti coi sloveni, dopo che i ga fato le ronde miste, gavemo pensà ben de metar insieme i nosrti vigili co quei de Ronchi però me par che inveze de una ronda xe vignù fora una randa e savè cossa che xe una randa?… una cagada cussì granda! E a Staransan, xe i soliti esageradi, i gà dito" Cossa! voi metè insieme i vigili?… e alora noi metemo al tubone!" Par farli star boni, al nostro Podestà ghe ga dito a quel de Staransan: "sta a sintir, omo, se te vol che femo qualcossa insieme podemo far la sagra de le rasse, parchè tante rasse come qua a Mofalcon dove te le trove?" Gavemo neri, gavemo maronsini, gavemo olivastri, gavemo cabibi e gavemo anca giali, tuti se domanda de dove xe vigniudi fora tuti sti giali e mi lo so. Se ricordè quando che qua in porto i ne scarigava tute quele auto che le vigniva de là, le famose "auto gialle". Bon, quela volta i ga vardà e controlà par tut e no i se gà dimenticà de vardar tal baul dei auti? Fodradi! Concitadini, mofalconesi, spetè che desso ve lasso quatro bele crodighe. Ve lasso l'ospedal, e cossa, dirè voi, de novo, desso che i lo gà finì e anca inaugurà. Ciò, a proposito, robone par l'inaugurassion. Iera par tuti i gusti e par tute le età. I gà comincià col balo de san Vito par quei de una certa età. I gà continuà co le ernie col disco par i più giovani e i gà finì coi foghi de sant'Antonio par tuti. Ma mi voio lassarve l'ospedal vecio. Cossa i farà de quel? Qualchidun ga proposto de far un casin, ma dopo i ga lassà cascar l'idea parchè un ga dito che nissun gavaria visto la diferensa. I se ga lamentà però che ta l'ospedal novo ghe xe zento posti leto de meno e alora quei de la magnadora, furbi lori, cossa i ga fato? Zento loculi de più in cimitero! A proposito de casin, go provà a seguir la quistion de le mile lire e de quel che go savù te ghe meteve mile lire ta le mudande de le balerine, però quel che no se ga capì xe che quando che i se le cavava dove le meteva le dosento mila lire? Ve lasso al mercà, e quel continuarè a cucarvelo parchè se par l'ospedal gò predicà 27 ani al mercà xe pena 14 che i lo ga fato. I dise che nol ga più acqua, come che no gavarà più acqua le piste ciclabili che iera diventade come canai, però se no le se alaga più i me ga de spiegar parchè la capitaneria de porto ga messo 'na barca in giardin? Ve lasso le terme, anca se la zo i voleva far un'altra aciaieria e meterla ta la cassa de colmata che doveva servir pa la SGNAM. Fin che un ga dito: "Ma che cassa de colmata, metemola drio de man in cassa integrazion": Finì al progeto. Ve lasso i lavori publichi de la Comun, quela bela rotonda che xe sul stradon par Ronchi che quel che la ga pensada al se sta ancora domandando cossa che al gaveva magnà quela sera par far un incubo compagno. E quando che i auti ga comincià a sbrissar ta la rotonda tuti ga dito: "te ga visto che iera proprio un lavoro de merda". Altro bel casin i ga fato col monumento a Toti, parchè adesso ghe xe i napoletani che i vol quel de Maradona. Adesso però per s'ciarirse le idee i fa al lucernaio novo ta la Comun, e par rinfrescarsele i sta pensando de sistemar la fontana parchè visto l'esempio de l'ENAM i se ga dito, femola più granda parchè acqua fa schei. E vissin de la fontana no ghe xe quel giardineto dei disastri, ehi, voi de la magnadora, gavè volù cavar el pisador, gave visto che fine che ga fato i alberi. Go sentì che anche in Cantier i ga de far dei lavori de ristruturazion su la tore, "E cossa, -ghe go dito- gave de metar un altro nome ancora, prima CRDA, dopo Italcantieri, dopo ancora Fincantieri, e desso cossa vole metar, SCLAUZERO?" I me ga risposto che noi ga nissuna scrita de far, i ga solo de trovarghe el posto par al muezzin. Concitadini, ogi pol essarghe Dame, pedoni, tori, ma al Re son mi e alora, maestro…un momento che qua me vien in mente un altro maestro, che da qualsiasi parte che al sia andà, probabilmente el starà insegnando a cantar Viva la Roca. Ciao Piero. Maestro taca banda… |
|
 Autore del testo Gilberto Sgualdini |
|
|
|||