home     torna indietro

Corteo degli sposi e testamento

 

Testamento 2002	Martedì 12 febbraio 2002  ore 12.00
Sior Anzoleto Postier	Concitadini zovini e veci, mofalconesi indigeni e oriundi, bisiachi! Oh Dio, almeno spero, comunque se qualche cabibo no capissi come che parlo al ghe domande spiegassion a quel vissin. E qua me vien de rider, parchè voio vedar come che farà a spiegarghe al bisiaco un cabibo a un altro cabibo. Ano novo, ano de cambiamenti. Xe cambiada la magnadora granda , xe cambiada la magnadora nostrana, xe cambiada l'Enel, xe cambiado l'ospedal, ma sopratuto xe cambiadi i schei. Adesso gavemo i "euri", ciò gavè sentì, no ghe va miga bei ai linguisti che disemo "euri", i ne ciol anca pal cul, i dise: "Senti come parlano, dicono i euri, i auti". Ah si, e alora quei che dise:"Du la tu a metut i cjalsins e i bragons" parla in lingua? Però i vol che 'sta lingua la sia insegnada anca a scola, proprio qua, fra filipini e marochini, fra cinesi e indiani, fra siciliani e napoletani e coi galipolini che parla al bisiaco meio de mi. Cossa te vol, i dise che bisogna comunicar. Semo ne l'era dela comunicassion: cul telefonin, cul Internet, basta comunicar, ma ve capita mai de ver l'impression che quando che te parle con qualchidun quel no te sta gnanca cagando, e te sinte de quei discorsi che, tanto par star su le robe fresche, fa più o meno cussì: "Ciò, te gà visto cosse che xe aumentadi i fenoci?" e quel altro: "E bon, par quel anca le putane xe bastansa"
A parlar de comunicassion e de putane me porta, voia o no voia, a parlar de magnadora granda. Concitadini, al xe come mi! Mi rivo, stago un poco, vado via e dopo torno. Cussì anca lu: al iera rivà, al xe sta un poco, al xe andado via e adesso sua emittensa el cavalier al xe tornà de novo. Ma se al va avanti cussì fra un poco al tornarà via, e dopo cossa ne resta? Un ulivo ransido, un steco de garofano, una margherita sfiapida, fiori, solo fiori, però: non fiori ma opere di bene, nissun eh? Comunque al Silvio nassional popolare stavolta al ga fato un contrato con noi, metendo par iscrito tuto quel che al gaveva de far, poco tempo fa al ga dito che lu al iera a posto, che al gaveva fato tuto, ma se pol saver che copia de contrato che gaveva lu? Forse quel che al ne ga leto a noi iera un de quei contrati come quei de le assicurassion, con le clausolete scrite in picio, che le xe scrite in picio picio, ma l'inculada xe granda granda. Comunque la magnadora granda ga dito che cambia tuto, come la nostra magnadora, che a parte un assessor, che te lo vede a ocio che al xe cambià, ga lassà tuto come prima. No, spetè, qualcossa i ga cambià: i ga spostà da una strada a l'altra i busi. Lori comunque i gaveva dito che i voleva continuar a far quel che gaveva comincià la magnadora che iera prima. Gnente! Oh Dio, i iera partidi anca ben, difati i ga messo quel assessor che ve disevo prima a la viabilità par continuar le opere scuminziade, però i ga molà tuto quando che i xe rivadi a discuter de le nostre ormai celeberrime piste ciclabili, e un ga dito: "Va ben continuar quele che xe, ma no volarè miga farne far la Mofalcon - Dakar in bicicleta?". Concitadini, Mofalcon xe al comun più onesto d'Italia, come, dirè voi, qua i ga pena ciapà un boss de quei che iera ani e ani che i cercava e mi parlo de onesti. Ve digo mi, tuti dise che la mafia no esisti, che le tangenti no se paga più, ma noi, concitadini, gavemo al coragio de dirlo qua in Piassa, davanti de tuti, Mofalcon xe l'unico comun d'Italia che paga al "Pizzo". Però me par che al volessi un aumento de paga, no lo ga dito apertamente, ma ben lo ga fato capir quando che tuti ghe ga domandà parchè al gaveva scelto un assessor foresto, e lui ga risposto che ghe pareva giusto cussi, visto che i lo paga un bianco e un nero. Però, anca lori i continua co la fissasion de quei de prima, i parla sempre de far diventare al Centro "el salotto buono della città". Mi no so come che ga le case lori, ma mi me par che prima de rivar in salotto se passa par l'entrata, par l'andito, pal corridoio, e viste le entrate, i anditi e i corridoi che ga Mofalcon prima de rivar tal "saloto bon", e go fato anca la rima, xe come ver le mudande firmade Armani soto un par de braghe sbregade tal cul. Concitadini, prima de lassarve in eredità quele quatro crodighe che gavemo, devo far una comunicassion de servissio: volevo avertir che se qualchidun vol querelarne, el sapi che no gavemo una lira e de euri gnanca a parlar. Xe proprio vero che xe cambiada la politica, una volta i gavessi fato carte false parchè te parle de lori, desso invece i te fa carte bollate. Una volta i beveva anca qualche bicer in compagnia e forsi par questo i iera più de spirito. Concitadini, mofalconesi, ve lasso l'ospedal novo. Novo par modo de dir, parchè xe vinti ani che andemo vanti co sta loica e no capisso parchè noi diventemo veci e lu resta sempre novo. Penso però che i farà ancora cambiamenti, parchè visto che lì del cine no i riva ancora verser la sala par far zugar al Bingo, che po saria la tombola dita par american, i trasferirà tuto al pronto soccorso cussì te passe almeno el tempo tanto che te spete quele quatro o sinque ore, però là no te vinsarà schei, se te fa Bingo te vinsarà un visita del dotor. Anca i sistemi sanitari xe cambiadi, adesso xe la gente che se fa operar a vivo, no i vol più l'indormia parchè se no ghe scadi al disco orario. L'altro giorno go incontrado un e ghe go domandà cossa che el fasseva lì in ospedal. "I calcoli", al me ga risposto, "Ta la cistifellea?" ghe go dito. "No" al me ga risposto "stago fasendo i calcoli de quanto tempo posso ancora star prima che i me daghe la multa par divieto de sosta". Ma se te ga premura e te se sa rangiar, te pol sempre andar ta l'ospedal vecio, dove che co quel che i ga lassà te pol farte le visite self service, pecà che là le infermiere ghe somiglia tanto a le pantigane. Parlando de robe vece fate passar par nove, ve lasso la central de l'Enel, che desso no so più come che se ciama e no so gnanca più se ciamarla central eletrica o inceneritor, parchè pararia che insieme cul carbon i volessi brusar anca le scovasse. Xe tuti che brontola par sta roba de le scovasse, ma a mi me par che la ne xe andada più che ben, ve imaginè se la central iera a gas, oltre che al gas cossa i ghe meteva: le scorese? Visto che semo in tema de scovasse, ve lasso el novo sistema de racolta, co quei sacheti giali cussì trasparenti che tuti sa cossa che te beve, cossa che te lege e quanto che te magne. Tuti pensarè, ma come i fa a saver quanto che magnemo. Facile, i conta quanti rodoli de carta igienica che te ga frugà. Tanto te caghe, tanto te magne e cussì i se sa anca regolar par metar le tasse su le fognature e co quel po' po' de tubone che i sta fassendo te se pol imaginar che sopa che ne riva. Tubone che xe anca la causa de tuti i supermercati che i ga fato e che i farà, parchè i imprenditori no xe moni, i ga pensà: "co un tubone cussì te sa quanta che i ghe ne fa, de sicuro i magna come ludri. Concitadini, ve lasso anca l'acquario postal, go dito acquario invesse che ufficio parchè ogni volta che vado me par de vedar una vasca de pessi. No so se gavè mai provà a vardar un acquario: te vede che ghe xe sempre un pesse vissin al vetro che te varda e drio de lu ghe ne xe altri diese che va vanti e indrio e noi te ga gnanca pal cul. Però devo dir che ga vudo anca lori i so problemi co i ga dovù pagar le pinsion co i euri e i doveva spiegarghe a le vecete che quei quatro bilieti che i ghe dava iera uguale de prima, tanto, che una sioreta ga dito: "Ah, si. Alora mi me par che xe sa diese ani che i me paga cui euri, parchè anca prima i me dava pochi bilieti". E meno mal che le nostre Poste xe cussì, parchè gavè visto in America, dove che le funsiona ben, i le doprava anca par spedir i virus. Se li spediva co le nostre poste, ora che i rivava, i fasseva in tempo a trovar la cura. Solo un se ga un poco rabià, quel de Aris, che col ga sentì che i mandava al carbon-chio par posta al ga dito: "Uostia, vedi ti, sce mi saveva che sci podeva mandar par posta no gavessi fato tanta fadiga par tuti sti ani". Concitadini, no me son dimenticà del mercà, ma go paura de dir qualcossa parchè l'ultima che ga vu a che far, xe stada una vaca de Benati, che sintindo che i la voleva portar al mercà de Mofalcon, la ga tacà a rider e rider che ghe xe vignude le convulssion, tanto che i la ga ciapada par mata e i la ga fata fora. E alora xe meio che taso parchè se parlo me vien de rider anca mi. Go comincia cui euri e finisso con lori, sti novi soldini che i sta fasendo andar a remengo un mucio de gente, specie quei che se magna le onge, parchè, se no te ga onge no te rivi cior su quei che i te da de resto e par no far figure de mona te li lasse de mancia, go visto mi gente che ga pagà 5 euro un bicer de vin, quasi diese mila lire, parchè noi rivava cior su al resto. Concitadinen, monfalconesen, atesso io vaden vien, parchè parlo cussi'? Parche' se tornara' i Savoia chissa che no torne anche i Asburgo e alloren: Maestren taken banden…
Autore del testo Gilberto Sgualdini

 

inizio pagina     home     torna indietro