|
 |
Corteo degli sposi e testamento |
| Testamento 2003 | Martedì 4 Marzo 2003 ore 12.00 |
 Sior Anzoleto Postier |
Concitadini zovini e veci, mofalconesi indigeni e oriundi, son rivà. Go ris'cià de farmela in braghe parchè no savevo se gavevo ciapà la strada da la parte giusta o riversa. Qua come che te se gire te se trove un senso unico che prima no iera o un divieto de acesso che i se ga inventà sul momento, par quel la mularia gira de note, par studiar le strade che i podarà far de giorno. Go vudo la disgrassiada idea de far un giro da le parti de San Pol: tragedie! Go visto gente che pianseva come vedei a sinque metri de casa parchè no i saveva da che parte rivarghe. Go visto gente che partiva de casa co un panin in man butando fregole par tera, "Ara che bravi - go pensà - i ghe buta de magnar ai useleti." Invesse no, i segnava la strada par saver come tornar. In paneteria te sintive: "Che pan ghe dago?" "Quel che la vol basta che el gabie tanta molena che go de andar fin l'Anconeta:" Go visto un che girava par de lì vardandose intorno tuto interessà, ghe go domandà: "Ti chi te son?" "Schiavo!" al me ga risposto, "Ah, te son schiavo anca ti de sto casin de strade?" "No, mi son Schiavo al progetista." e co la gente ga sentì chi che al iera, al ga dovù inventarse do divieti de acesso par no farse ciapar. Adesso i meterà le man anca su l'Anconeta: la Protession Civil xe già in alarme cui termos, co le coverte e coi cani per cercarve, ma mi penso che i farà come che ga fato Berlusconi co xe vignudi i Euri: lu ne ga mandà a casa la machineta par far i conti, sti qua ne mandarà a casa una bussola. |
|
La go dita, spero che Don Vale me perdoni se go nominà al nome
de Dio invano: Berlusconi. Lu fa tuto: al Presidente, al
Ministro, al Giudice, l'alenador de balon, al bel xe che al xe
convinton, come quando par television al ne ga contà che fin
desso al ga fato tuto quel che al gaveva promesso de far: al ga
aumentà le pension, infati adesso i vol i soldi indrio, al ga
aumentà i posti de lavoro, infati la Fiat ga mandà casa tuti par
far posto, no ghe xe stadi aumenti dei pressi, ma solo
arotondamenti, se dopo i arotondamenti iera de diese mila lire
quel no ga importansa. "Co la democrassia come la metemo
Presidente - i ghe ga domandà - Se aumenta la luce te toca taser
parchè se no chi te da la corente, se aumenta al gas te toca
taser se no chi te da de scaldarte, aumenta al telefono e te
toca taser se no dove te se tache, aumenta la posta e te tase se
no chi te paga i boletini, paga e tasi no me par tanto
democratico" "Mi consenta - al ga risposto - prima lo gave ciapà
da la DC, dopo lo gave ciapà dal PC e adesso lo ciapè tal cul
anca da noi, se no xe democrassia questa?" A sto punto sorge
spontanea una domanda: "Ma alora Presidente come la metemo co
l'arteriosclerosi." "A quela - al fa - la go venduda, desso giro
in Mercedes." E dopo al te dise compra, spende, che cussi xe più lavor e più ben star par tuti. Primo: dameli e secondo no sta farmeli spendar in boli, assicurassion, luce, gas, telefono, bensina, mutui, tasse che tuto questo invesse che far girar l'economia me fa solo che girar le bale. Anca la publicità i fa, te se imagine Bepi che torna a casa dopo diese ore de lavor in oficina e al ghe dise a la femena: "Maria, te ga fato de magnar?" "No Bepi", "Te ga lavà par tera" "No Bepi", "Te ga lavà i strassi?" "No Bepi" "E se pol saver che c..zz che te ga fato tuto al giorno?" "Go comprà al dentifricio Bepi" "Maria ara che al dentifricio no te servi" "E parchè Bepi" "Parchè adesso te spaco tuti i denti Maria!" E quei altri? Quei altri i sta ancora sbarufando de chi che xe stà la colpa che i ga perso la caregheta, mi credo che i la gabie persa parchè i ga tentà de sostituir quela mortadela de Prodi co un vero e proprio salame. Desso però i sta fasendo una nova tatica: par qualsiasi monada ale, tuti in piassa, gnanca che fossi ogni giorno l'ultimo de l'ano, e cossa i fa in piassa? I bati i tamburi, i sufia tai fiscioti, i pesta le pignate come che faseva una volta i cantierini? No, i fa i giritondi. Adesso speto solo che Rosi Bindi domandi indrio le so pignatele dopo semo posto. La nostra magnadora invesse pol solo che sugar …de sconderse, xe che se i lo fa, i ga paura che nissun vade a cercarli. Concittadini, cossa posso lassarve, a parte in braghe de tela, però a quel ghe ga sa pensà la magnadora. Ve lasso l'ospedal: quel vecio che dai e dai i ga deciso de trasformarlo in casa de cure termali parchè i ga dito che i fanghi che spussa i pol recuperarli tal canal li vicin e per l'aerosol i se rangia co la marijuana che la no la manca. Ve lasso anca quel novo dove che sti giorni te sentive che i diseva: "No xe de meravigliarse se in teatro i fa l'ospedal qua noi femo cine." Ve lasso al mercà coverto: quel vecio che xe diventà una galeria d'arte che me pareva meio co iera in mostra suchete e tegoline, durerà poco, prima o dopo i farà una piscina. Quel novo che da mercà dove che no iera nissun, xe diventà parchegio dove che no xe nissun lo stesso, durerà poco, prima o dopo tornarà fora l'acqua e visto che al se alto, i farà una piscina par i tufi. Ciò adesso me son acorto che qua le capele le femo sempre in dopio, forse se ga inacorto anca la magnadora visto che i gaveva tirà fora al discorso del bilinguismo. E qua xe vegnù fora un degheio: Si, No, Forse, Ma cossa te son mato, e via avanti cussì, fin che un ga dito: "Provemo a vedar come che se podessi tradur le strade che gavemo." Alora xe vegnù fora che Vial San Marco podessi diventar Vial San Gennaro, Via Fratelli Rosselli podessi diventar Via Fratelli Esposito e cussi avanti, fin che un ga vudo un ideona e al ga dito: "Parchè star li tanto a bassilar, parchè no femo una via unica." "E che via femo?" i ga domandà. "Femo via i Cabibi e po bon!" De bilinguismo no se ga più parlà. Ma no xe stà miga l'unica lampadina che se ghe ga impià in testa, machè. Xe tuti che rugna par soto che saria ora de finirla che i cani i fassi le so robe par i marciapie e che i spissasi par tuti i cantoni, alora i ga dito: "Ghe pensemo noi a far finir sta storia, ghe femo passar noi la voia a sti cani." Dito e fato: i ga comincià a taiar i alberi. E i vigili, altri boni, adesso, d'acordo co la magnadora, i se ga messo coi auti tai rioni par tentar de risolver i problemi che te podaria ver, solo che i se ga messo dove che ti no te rive a parchegiar l'auto cussì se te se ferme par dirghe qualcossa i xe anca boni de darte la multa par divieto de sosta. So che son fora stagion ma voio lassarvelo lo stesso: parlo de l'albero de Nadal che i ga messo in piassa, che xe sta un regalo de un consiglier che tanto par no far nomi iera Bonetti, che forse ghe par de esser come Haider pecà però che al ghe somiglia più a Haidi. Fato stà che co al gà consegnà sto albero el ghe ga dito a quei altri de la magnadora: "Fin qua rivo, però par i addobbi ghe pense voi." "No sta preocuparte -i ghe ga risposto- par le bale ghe pensemo ben noi." Ve lasso le piste ciclabili, altra falopa. Forse i ga pensà che co tuti i cinesi, che de biciclete i pol soterarve, extracomunitari e comunitari extra che xe qua, gavessimo vudo chissa che traficon, ma i cinesi invesse de biciclete i compra boteghe, i extracomunitari no i li paga cussi no i ga i schei per comprarle e i comunitari extra i le ruba e no penso che i sie tanto moni de farse vedar par le piste ciclabili. Co i schei che i sparagnava i podeva far de meno de aumentar la tassa su le scovasse anca parchè, prima i te dise de darghe una man fasendo la racolta diferensiata che cussi i sparagna qualcossa e i pol riciclar i materiai, e ti come un mona te sta li a spartir muceti, e dopo per ringrassiarte, ciapa i te aumenta la tassa. Comunque, tasse sempre sarà, noi anche saremo sempre qua e ghe sarà sempre gente su quel balcon, solo qualchidun mancherà. Concittadini, mofalconesi, de Giotto tuti se ricorda de la sua "O", de Zorro tuti se ricorda de la sua "Zeta", de un nostro amico ansi, de un amico de tuti voi, se ricordaremo sempre del suo "otto". Ciao Fabio! Maestro taca banda |
|
 Autore del testo Gilberto Sgualdini |
|
|
|||