home     torna indietro

Corteo degli sposi e testamento

 

Testamento 2004	Martedì 24 febbraio 2004  ore 12.00
Sior Anzoleto Postier	Concitadini zovini e veci, mofalconesi indigeni e oriundi, bisiachi, cabibi, tovarisky e tovariske, basta no nomino altri parchè se no al podestà taca co na loica che nol finisse più: bangla qua, bangla là, e che bangle ara. Popolo de Mofalcon, son rivà per darve la triste notissia: i ne ga lassà in mudande! Xe ani e ani che i tenta, tuti ga tentà: bianchi, rossi, verdi, neri, ma solo Lui xe rivà. Lui al cavalier sensa rughe, al ga tanto fato e tanto remenà che al ne ga cavà anca la canotiera. Ormai savè tuti parchè al xe sensa rughe, parchè al xe andà a farse tirar la pele però tanto che a Lui i ghe tirava la pele, a noi i ne slargava al buso. Mi go anca savù che quando che al se ga spoià par farse operar, al dotor ga visto che tal peto al gaveva un ritrato grandonon del duce. "Presidente -ghe fa al dotor- cossa la ga lì un tatuagio?" "No la staghi dir monade dotor -ghe ga risposto lui- ma che tatuagio, no la vedi che xe una voia." Chissà se anca al nostro podestà ga voie, forse lui gavarà quela de Bartali. A proposito de dotori, bisogna che i fasse qualcossa parchè le preson ga de essar tanto infetade che metà basta, gave visto tuti quei che i ga ciapado parchè i ghe ga ciavà i schei a quei disgrassiadi che credeva de far un afaron comprando assion, fin al giorno prima i iera distiradi cu la pansa par aria a ciapar al sol dei Caraibi, e noi qua, come che disi la nostra cantante Elisa, a bater brochen, e subito dopo messi in canon, ghe xe vegnù fora tuti i mai de sto mondo. Alè, subito dotori come funghi par visitarli, i podeva portarli tal nostro ospedal che cussi i faseva ora de finir la condana prima de esser visitadi. Nissun però rivava a capir che mal che i gaveva, fin che no xe rivà al solito profesor furlan che al ghe ga intivà subito: al ga vardà e al ga dito "Par mi, solo al Par-malat."
Ano bisesto, ano malsesto infati gavaremo de novo de andar a votar. Tanto ormai la politica xe tuto un zugo: un pochi fa girotondo, un pochi soga a guardie e ladri, un pochi e gnanca tanto pochi soga a rubamasseto, e ogni tanto qualchidun tal Parlamento i la buta lì: "Dai muli, andemo a far quatro segni" e via tuti a votar. Me par che stavolta i torna metar in tola la mortadela, speremo solo che no la coste cara come l'altra volta, ma ormai xe tuto caronon, desso le babe per far vedar che le ga, no le se mete in pelicia e gnanche le se cariga de colane e de anei, desso par meterse in mostra le se fa vedar tanto che le compra le suchete. A parte le votassion, grandi cambiamenti anca sto ano: xe cascà un altro muro, no pensar mal e no cominciar a ciamar avocati, go dito muro e no sofito. I ga butà zo al muro de confin co la Slovenia e de là qualchidun ga za brontolà, go sentì un vecio slavo che diseva: "Sce savevimo che butava zo muro, podevimo metar rede che costava meno." Però no volessi che i dopre i rovinassi del muro par soterar i buoni de bensina, bisognerà che ghe domando a qualchidun de la magnadora, pol darsi che i sa za qualcossa visto tuto al friser che i fa par finir le piste ciclabili. A sto proposito, sorge spontanea una domanda: dopo essar rivadi in bicicleta dove che te gaveve de andar, dove te mete la bici parchè che no la ciape la transvesuviana par la Cantier? Se volè che andemo in bici, fasè in modo che podemo far anche più de un gireto. Za adesso, se co l'auto te ciape soto qualche cabibo in bici, ghe xe al ris'cio che quela bicicleta che te ga scavassà sie la tua. Multiconcittadini, semo in un Comun multirazziale o per dirla de fin multietnico, gavemo anche la società multiservissi, gavemo al cine multisala e al parchegio multipiano no sarà miga che co tuti sti multi semo a Grado invesse che a Mofalcon anche parchè pol somigliarghe co tuti sti stranieri che gavemo. Par saver qualcossa de più, una volta ghe go domandà a un che stava de casa vissin a quei del Bangladesh come che i xe. "De pianser" al me ga dito. "Parchè, i se comporta mal?" fasso mi. "No, par le sivole che i cusina" al me ga risposto. "E desso che vegnerà la bela stagion e se verserà le finestre sarà ancora pegio" al me fa. "Ma dai -ghe fasso mi- ta la central eletrica i brusa pur le farine animali, te volarà o no metarghe un fia de sofrito." Andarà a finir che ne riconosserà tuti, quando che qualchidun ne incontrerà al dirà subito: "Ti te son de Mofalcon." "E ti come te sa?" "Facile, te spusse de fritolin!" E co la bela stagion andaremo tuti in spiagia a Marina Julia, tuti i putei co le so palete e i so seceti, ah, una roba importante, ricordeve però de meterghe la sabia tai seceti se no li porta par niente. Concittadini, desso svodo la me borsa e impieno le vostre anche se me par che le gavè gia bele sgionfe. Ve lasso le opere comunali: al parchegio multipiano, svodo, al parchegio del Cantier, svodo, al vecio mercà trasformado in strasseria de opere moderne, svodo, se tanto me da tanto, speremo che i fasse anche un novo Municipio. I ga spacà tuto par portar el condoto ta la Comun, "Ma come -go dito mi- no ghe ne xe za bastansa roba la dentro." I ga spacà tuto par far la zona pedonal in mercà, i ga de spacar tuto par far un altro parchegio, i ga de spacar tuto a l'Anconeta, i ga de spacar la piassa par farla nova, ohi giovinoti no ve par che ste rompendo tropo. I ga dito che Mofalcon xe bruta, sarà bei lori, "Xe de rifar la piassa qual disegno ve piase de più?" i ga domandà. I podeva almeno domandar prima se volevimo che la piassa vegni cambiada. "Bisogna meter man a la viabilità de l'Anconeta" par desso i ga messo solo che un dito e ghe xe gia un bel casin, te se imagine coi metarà quei altri quatro. Visto quel che i ga fato sul stradon a li del centro comercial no rivo ancora imaginarme che ghirighori che i sarà boni de inventarse par l'Anconeta che proprio tanto neta gnanca no la xe. "Bisogna darghe una svolta alla città" e so a girar e rivoltar sensi unici e se te vol svoltar par Ronchi a momenti te toca andar in piassa cussì dopo che anche quela sarà solo pedonal, te parchegerà li del Liceo e te ciaperà l'autobus par andar a Ronchi. Visto che go nominà i autobus, ve lasso le fermate. Bisogna che ghe digo parchè forse noi se ga inacorto che ormai i autobus i xe grandi più o meno come pulmini e che le striche che i ga fato par tera le ga la misura de quando che iera le coriere dopie cul sufieto. tal meso. E se par un momento te mete do rode de l'auto dentro le striche giale, riva subito al corpo dei marins de le vigilesse, si parchè le se come i marins che saltava zo de le barche coi mitra, cussì lore le salta zo de l'auto cul blocheto e le te dise "Guardi che sono due punticini in meno sulla patente." Un ghe ga dito: "Ti te me cave do punti e mi te meto sete." "Ah, si e come fa?" "Ciogo al cric de l'auto e te lo meno su la testa cussì dopo se te vol, tanto che te spete al pronto socorso te ga anche al tempo par darghe la multa a tuti i auti del piassal de San Pol. E se un de quei te martela de novo cul cric, adesso che i metarà l'elicotero li de l'ospedal, te podarà sempre darghe la multa al pilota, tanto che al te mena a Catinara, parchè ghe iera scadù al ticket. Parchè se reprimere è giusto, darte cul cric se meio." Visto che li son rivà, ve lo lasso: l'Ospedal. Gnente de ecessional, tuto regolare, tuto organisado come sempre, come co la risonansa: un casin per verla, barufe cun tuti, e dopo che la ga vuda: "E come la portemo?" Co l'elicotero parchè a sto punto te dago cul cric anca a ti. Adesso però no se dise più che te vien fora per drio de l'Ospedal parchè desso i ga fato l'uscita dei morti sul davanti. Volevo dirghe a quei del centro comercial che se i ga pagà parchè che i fassi le strade che de rifa o de rafa fa passar par forsa i auti par de lì, quei i podeva sparagnarseli parchè quei che vien fora de là ormai la spesa noi la fa più. Ve lasso le scovasse, ansi i camion de le scovasse. I gaveva dito che i vigniva a le quatro de mattina par no disturbar al trafico e la gente che gaveva de moverse par le strade ma forse anche i orologi che ga lori xe scovasse parchè te li beche sempre a metà mattina. Quei, anche se te son ta na strada larga oto metri, i xe boni de metarse in modo che par sinque centimetri no te rive passar co l'auto e te toca starghe drio e spetar che i fasse al lavor pian e ben e se no ben almeno pian. Dopo i te paga col solito: "Stiamo lavorando per voi." No xe vero, ne ste rompendo i …. A noi. E ta le scovasse trovemo anca i novi pacheti de sigarete, quei che ga quele bele scrite che quando che te va a cercar in scarsela l'acendin par impisarte al spagnol, te rumeghe un poco de più e te se toche anche qualcossa de altro. Go visto un che dopo che al ga leto sul pacheto de sigarete che iera scrito: "Il fumo favorisce l'impotenza sessuale", al xe tornà dentro e al ghe ga dito a la tabachina: "Siora, la me podessi cambiar sto pacheto, la me daghe un co scrito Il fumo uccide, che xe meio." De fumo gavemo parlà, e fumo ve lasso, ve lasso al camin de la Central che voia o no voia al xe sempre là. Una roba però no go capì: quando che i voleva portar al gas gavemo fato stala par no verlo, adesso femo stala par averlo. Me par che Mofalcon ghe piase far casin per qualsiasi roba e quala ocasion meio de ogi per farlo, ogi, xe Carneval, maestro… taca banda.
Autore del testo Gilberto Sgualdini

 

inizio pagina     home     torna indietro