home     torna indietro

Corteo degli sposi e testamento

 

Testamento 2005	Martedì 8 febbraio 2005 ore 12.00
Sior Anzoleto Postier	Concitadini zovini e veci, mofalconesi indigeni e oriundi, con l'influenza e senza, anca sto ano son rivà, ma che fadiga, gira de qua, volta de là, ocio al buso, son rivà imbriago sensa bevar. Go sempre dito mi che bisogna capirse quando che se parla, xe inutile carigarse de tecnici o de Sessori foresti, se proprio volè ciorli insegneghe almeno al bisiaco cussì no sucede quel che xe successo quando che ghe go dito a l'Asessor de le strade: "Omo, varda che mi al giorno de Carneval go da essar in piassa par mesogiorno e co sto casin che xe sempre li de l'Anconeta che xe le file dei auti fin San Pol da na parte e fin tal cavalcavia da quel altra, go paura de rivar tardi, fa un favor mete quatro tubi." Gavè visto che casin che i ga fato. Ghe go domandà alora al podestà cossa che ghe iera saltà in a mente de far sti lavori tuti insieme giusto par incasinarne la vita parchè proprio gavevimo bisogno e al me ga dito: "Cossa te vol Anzoleto, voio lassar un qualcossa de significativo." "No sta preocuparte -ghe go risposto- te vedara che te faremo lassar!" So cossa che volè dir adesso, che xe inutile che fasso le prediche su quei che no xe bisiachi quando che me son ciolto na femena mesa foresta si, però la xe più bela e più bona de quei che se ga ciolto al podestà.
Gavè de saver che volevo anca cambiar luk come che se dise par moderno, in poche parole volevo cambiar al capel, invesse de la bombeta volevo metarme una bandana, iero un poco indeciso sul color però gavevo quasi deciso par al bianco, quando che i me ga dito che podeva essar pericoloso se gavevo de far fotografie. Tut in un moment me xe vignù in a mente de quel che ghe iera sucesso al Re dei Re e alora go cambià subito idea, parchè qua se qualchidun vol al trova de tirar anca un mucio de rovinassi. Voio però meterve a la prova par vedar se se dei bravi taliani, ve voio far un test come che se usa adess. Alora, femo finta che l'onorevole cu la B maiuscola o cu la B come bandana, come che volè, al sia andà a farghe visita ai nostri soldati che xe là in meso al sabion dove che i ghe spara dosso ogi si e doman anca, voi fasè parte de la gita come fotografi, dopo un poco se acorsè che ghe xe un beduin che i lo sta ciapando de mira cul mitra. Qua ve voio desso, gavè due possibilità: o lo avertì e ghe salvè la vita, o gavè l'ocasion de far la fotografia del secolo che la ve pol cambiar la vita da cussì a cussì. Adesso gave de essar sinceri e de risponder come che ve sintì, onesti eh me racomando, alora, la fotografia la fasè a colori o in bianco e nero? Concitadini, ghe son cascà anca stavolta, go parlà de Lui, e come che te parle de Lui, par la par condicio no te pol no parlar de quel'altro, ecoli lì, de novo in guera par le elession de la magnadora granda, come Don Camilo e Pepone, sempre in gara come Copi e Bartali, sempre in copia come Giani e Pinoto, e se a un ghe diria: "Gianiii, se l'ottimismo xe al profumo de la vita, come mai adesso sinto spussa de merda!", e a Pinoto che xe sempre che al ne ricorda che xe sta lù a portarne in Europa, lo ciaparie a randelade in testa co un baston ciolto in Germania e a pedade tal cul co un par de scarpe comprade in Francia. Un o l'altro vinsarà, pensè che ne cambierà qualcossa, mi credo che l'unica roba che cambierà sarà al calibro. Spero solo che chi che vinse pare via quel ministro stile Santa Maria Goreti che vol far dei taliani, voi compresi, el popolo più virtuoso del mondo. Mi ve dago qualche indicassion e vedemo se indovinè. Xe un che ga za una certa età e qua niente de novo, al ga problemi co la femena parchè al se ferma in ostaria prima de rivar casa e anca qua tanti ghe ne xe, el ga problemi de pansa e de colesterolo per via del magnar e del bevar e anca qua piove sul bagnà, nol xe de Mofalcon. Adesso ve spiego mi. Caro ministro de la sanità, se la sera te se ferme a bevar un bicer e dopo co te rive casa la femena te siga parchè te spusse de fumo, no te pol frantumarghe i tondei a tuti quanti e vietar de fumar, se te piase i crodeghini, el salame de casa e al risoto co le martundele e no i te li fa magnar, no te pol spacarne le bale co le misure de la pansa che gavemo de ver perché ti no te pol magnar. Spero solo che adesso no te vegne fora qualche problema de prostata perché no te pol romperghe al cul a tuti quanti ormai te rive tardi: a quel ghe ga za pensà al to paron. Rivado al punto che se comincia a parlar de robe che entra in posti fastidiosi devo svodar la borsa e lassarve quel che go messo dentro per voi. Concitadini mofalconesi voi ste robe le gave de dirito e ve le lasso, anche a voi foresti che stè qua ve le lasso parchè me par giusto, gave volù la bicicleta a no speta che go sbaglia de legiar, gavè rubà la bicicleta e alora pedalè anca voi. Ve lasso l'Ospedal de San Pol che al sta diventando sempre più atressado, dopo la risonansa adess i ga anca al tomografo speremo che insieme al machinario i gapie ciolto anche i opsional che opsional in sto caso vol dir al personal par farlo funsionar, parchè ciol ciol ma el personal xe sempre quel, un in ferie, un malà, tuto sospeso. Anche ai ragi ghe xe diese stansete par farli, però xe sempre quei do tre che gira, una volta i vien fora de una porta, una volta i vien fora de un'altra cussì par che i sie in tanti. Se però te vol far una visita urologica te ga de andar a Gorissia parchè come che ghe lo fica tal cul lori ai mofalconesi no xe nissun. Finalmente go anche qualcossa de novo de lassarve, ve lasso la muraglia de la Marina nova, vedè cossa che vol dir l'integrassion dei popoli, i ghe ga fato verser botega ai cinesi e a quei del Bangla Desh e sicuro qualchidun, anca par curiosità al xe andà a comprar qualcossa tipo profumini, incensi e qualchidun magari gavarà anca ciolto una lampada a oio, che dopo a casa i la ga russada col sidol par netarla e xe vegnu fora un genio che ga vudo quela bela pensada, ma anche altre lampade iera stade vendude e da un'altra xe vegnudo fora un altro genio che visto che bruto che iera quel muro el ga dito che se podessi farghe cressar de sora dele piante, e ancora da un'altra lampada xe vegnudo fora ancora un genio che al ga dito forse però saria meio piturar quel muro de verde, se savevimo prima che no se rivava a far al spetacolo de la Cantada in teatro, podevimo meterli lori, sa in do ore quante stronsade che vegniva fora. Concitadini adesso comincio coi saldi e le offerte speciali, ve lasso un due per uno: la rotonda de l'Anconeta e la rotonda de la Piassa Granda. Li de l'Anconeta i ga de cavar via tuti i semafori e far una rotonda, spero che i cave anche la Madonina, no parchè no son religioso ma parchè prima o dopo vedarè che la cominciarà a pianser anche quela e alora i dovarà fermar tuto. E dopo son curioso de vedar come che farà a passar quei de le piste ciclabili, za adesso quando che quei due o tre che passa al mese i ferma tuti fracando al boton del semaforo, te vien de tirarli soto, dopo, che boton i fracarà prima de esser fracadi lori. Ahi che dolor, me son rivoltà al cortel ta la piaga, go nominà le piste ciclabili, vedè per quei che ga vudo quela bela pensada, doprassi anche con quei le scarpe ciolte in Francia. E de la rotonda de la Piassa cossa se pol dir, niente, i te ga mostrado al disegno de come che la vegnarà, e dopo par essar democratici, no domandar prima se te vol che la vegne cambiada o se la te va ben cussì come che la xe, no, i te ga dito: questo xe el disegno che gavemo deciso che va ben e adesso prova a dir qualcossa se te ga coragio. Pararia però che al Podestà se sia stufado de el casin che ghe vien fato soto le finestre e alora, forse se dovarà trovar qualche altro logo par le manifestassion par no rovinarghe al saloto al paron de casa. Volevo solo ricordarghe che Carneval, l'estate, Capodano, el vin, San Nicolò, le castagne, a Mofalcon le ghe xe ogni ano, però al paron de casa no xe sempre quel. Trieste ga fato bela piassa de l'Unità e adesso i la dopra par tute le manifestassion e i concerti, a gratis, ma cossa volè i ga al sindaco De Piassa. Mofalcon al farà la Piassa Granda bela, col campo de tennis e le butiq e i tornarà a metar i pissadori, cossa volè gavemo al sindaco Pissolito. Go de darve anche una notissia in anteprima, me par che adesso i organisarà un concorso parchè i vol rifar al palasso de la Comun e da vosi de foravia par che no ghe dispiasaria una costrussion a forma de lampada come quele che se parlava prima. Concitadini ve lasso la prima storia de sior intento: al mercà. Vecio e malandà ben o mal al tirava vanti, ma no volemo miga schersar, dai che lo femo novo, e dove lo femo? Ma sora una busa de aqua no, cussì lo alaghemo tuto. Dopo tanti ani passa par Mofalcon un dei soliti geni sfigadi che ne toca a noi e alora cossa femo del mercato vecio, ma ghe femo el teto novo no, cussi lo alaghemo tuto. Mofalconesi mi no voio meterve in preocupassion però dopo tanti ani i ga pensà de far le fogne nove, e se tanto me da tanto ste tenti. Ve lasso anche la seconda storia de sior intento: le terme. I gaveva za de cominciar a meterle a novo dopo che ta l'acqua i gaveva trovado anche tanti ioni: ioni de fero che rivava dal Cantier, ioni de soda che rivava dala Solvay, ioni de potassio che rivava da la Endesa, ma come al solito ferma tuto. Mi cossa volè, go domandado: "Cossa vol dir no va ben tuti quei ioni" "No, no, - i me ga dito - solo che adesso gavemo trovado anche qualche stronzio che ga roto tuti i ioni". A Mofalcon sior intento no sbaglia un colpo. Concitadini so che voi volessi meterli a smoio ta l'aqua de le terme ma spetè un momento, devo parlar dei vigili, adesso i xe stadi promossi parchè se vede che i ga impienà de bolini l'album dele multe e alora i ga vudo al regalo, però adesso che no xe più vigili semplici volessi dirghe al comandante se al podessi farne un favor a noi indigeni, se al podessi nominar un novo vigile solo par tendar i marciapie, visto quel che sucedi fra carossele, vecete e cabibi de marciapie che no se sposta gnanca par morir, comandante mi gavessi soto man anca un bravo mulo che ghe lo racomandaria, al se ciama Stefano, Stefano Zoff, la vedi se la riva metar una bona parola. Concitadini, mofalconesi, finisso lassandove anche chi che dise che ormai son vecio, xe anche vero che no son più de primo pel, xe anche vero che xe quaranta ani che me presento qua e forse sarè anca stufi de vederme e de sentirme, al passato lo go vissudo, al presente lo stago vivendo e al futuro stago pensando come viverlo parchè questo te mantien giovane, ma chi che vive solo de ricordi, di come eravamo e de rimpianti ormai se vecio anche in testa e a noi giovinoti quel che pensa quei veci no ne pol interessar de meno, e alora, visto che a la gioventù ghe piasi la musica, maestro taca banda…….
Autore del testo Gilberto Sgualdini

 

inizio pagina     home     torna indietro