|
 |
Corteo degli sposi e testamento |
| Testamento 2006 | Martedì 28 febbraio 2006 ore 12.00 |
 Sior Anzoleto Postier |
Concitadini zovini e veci, mofalconesi indigeni e oriundi, cabibi de
ieri, de ogi e de doman, foresti de ieri, de ogi e de doman,
bisiachi de ieri, de ogi e forse sensa doman. Gavè visto cossa che i ga combinà par sercar de no farme rivar fin qua: busi, deviassion, transenne, ruspe tal meso de la strada, ma mi son rivà lo stesso e desso come la metemo signori de la magnadora. “Se te son in bicicleta tienla per man – i me ga risposto – parchè gavemo cavà anca i portabiciclete”. Concitadini, anca sto ano, gnanca che fossi una novità, andaremo a votar e stavolta votaremo par la Magnadora granda e par la nostra Magnadora. Go savù che stavolta le elession le costerà un poco de più de l’altra volta parchè i ga deciso che oltre che le schede e la matita i ghe consegnerà a tuti i eletori un tubeto de vaselina tanto per ciaparse avanti col lavor, parchè sia che i parte da sinistra sia che i parte da destra, va finir che i sburta sempre tal centro. Penseve che scelte importanti che dovaremo far: dovaremo sceglier fra una mortadela e un salame, savendo benon che ciaparemo un formai sia da un che da quel’altro. Qua invesse xe diverso parchè i nostri missiadori no ga ancora ben deciso chi che ga de candidarse, forse parchè stavolta i ga pensier de ciapar lori al formai. Infati un botegher che conosso ben, al ga dito che anca lu al vol ciaparse avanti col lavor e alora al ga xa ordinà un mucio de valige parchè podarà esser che al ghe ne vendi tante. |
|
Botegher che come tuti quei altri pianse miseria, ma se una
volta i pianseva al morto par fregar al vivo, adesso bon par
lori se ghe xe restà ancora i oci par pianser, parchè la gente
xe sensa schei, tuti se lamenta che no i riva a la fine del
mese, che xa col venti i xe sensa un, e sto governo che no fa
niente. Mi se saria al governo gavessi xa trovà la solussion:
invesse che far riforme de scole, de giustissia, de costitussion,
bone solo che par lori, gavessi fato una lege che dise che al
mese dura vinti giorni cussi nissun gavessi problemi par rivar a
la fine. Specialmente quando che te scade al bolo de l’auto o l’assicurassion
e ogni volta te sacramente parchè de rifa o de rafa ghe xe
sempre qualche aumento parchè no se sa come, ma a le
assicurassion ghe aumenta sempre le spese, par forsa che ghe
aumenta le spese digo mi, i se mete a comprar banche, comprè
boteghini de verdura che costa de meno. I dovaria anche
vergognarse, come che se vergognemo noi a andar in banca a
domandar quatro schei parché gavemo bisogno, e te se senti dir:
“Siamo spiacenti ma non possiamo concedere quanto da lei
richiesto.” “Parché – te ghe domande - parchè no go bastansa
garansie?” “No – i te risponde – parchè se li gavemo xa magnadi
tuti noi.” Concitadini, no posso piu tignirme, devo, devo assolutamente dir qualcossa su sta piassa che no xe e no sarà piu quela che i veci ga lassado. Concitadini, mofalconesi, parfin la Roca se ga sconto drio de le impalcadure par no vedar sto disastro, però no go gapì na roba: la se ga sconto parchè no la vol vedar al scempio che i sta fasendo o no la vol vedar al sempio che lo ga deciso. Mofalconesi, no podaremo più doprar la piassa par le feste nostrane parchè no xe bel, no xe fin, la pol rovinarse, sicuro i comprarà anca un mucio de papucete che dovarà doprar chi che vol traversarla, sempre che i te lo lassi far. Amici miei, concitadini carissimi, i ga fato fregole del nostro biscoto. Però, fregole me fa vignir in mente i useleti, e me par che ta la nova piassa i vol metar anca albereti, forse quei useleti se poserà ta quei albereti e chissà che quei useleti posadi ta quei albereti no i scagassi par tuto e se i lo fa, ben ghe stà cussì i impara a disfar Mofalcon. Concitadini, rivado a sto punto, ve la lasso, ve lasso sta magnadora che visto al periodo ciamaria una magnadora olimpica parchè un giorno per l’altro i dise che: slita la fine dei lavori in piassa, slita la rotonda de l’Anconeta, slita la racolta diferensiata de le scovasse. Mi so che se slita tal giasso, se slita ta le scusse de banana e se slita ta le cagade, e qua me par che giasso no xe, scusse de banana gnanca, pol esser che qualchidun ga combinà qualcossa che no andava? Però qualcossa de bon i ga fato: Mofalcon ga vudo la nomina de città turistica, perché i ga dito che adesso invesse de andar a Aquileia, i turisti vegnerà qua a visitar… i scavi. Go anca savù che i ga ricevudo un invito par andar a far una piassa in un paese de la Sicilia parchè i ghe ga dito che come de lori nissun altro xe bon de trovar l’acqua. E co l’acqua volessi lassarve le Terme, visto che ogni tanto salta fora la vose che qualchidun vol meterle in funsion, ma visto che al discorso su scovasse e scovassoni xe slitado, slitemo anca su le Terme, come che semo slitadi un par de ani fa, come che semo slitadi diese ani fa, come che semo slitadi quindese ani fa, a sto punto me domando: che sia una cagada anca questa? Volessi lassarve anca al limoner ciamà Marcà, ma tanto quel pian pianin lo sta lassando tuti, in compenso ve lasso quel capanon refà e imbiecà un mucio de volte che vien doprado par le mostre de arte contemporanea e me par fin impossibile che noi rive capir che a noi, vedendo un cesso picado ta na parede l’unica domanda che ne vien in mente xe: “Ma come se farà a pissar fin la sora?”, son anca andado dal sessor de la cultura par domandarghe a cossa che servi quela roba e al me ga risposto che servi a incul… a incul…. Cossa xe scrito qua… a si, a inculturarne ben e no mal. Ve lasso anca al camin che fuma, se contenti, me par che adesso i volarà farlo andar a gas, proprio adesso che i ne manda al gas col contagiosse, tanto, mal che la vade, me par che se pol doprar anca al gas esilarante, ve pensè che bel, al scur, duri de fredo, e tuti che ridi come mati, tuti meno che un, un vecio podestà che xe andà perso ansi Persi, e penso che come che al vedarà che i meti i bidoni del gas tal golfo al cominciarà a rivoltarse come un bisato. Voio lassarve anca robe più fastidiose, come quei che gira de note par rubar, par brusar cassoneti, par spacar auti o par rubarghe al tacuin a le donete e questo i lo fa anca de giorno, xe mai possibile che no podemo più girar par Mofalcon, alora xe inutile anca far isole pedonali quando che no podemo gnanca far do passi par paura che qualchidun te salte dosso, e ti podestà xe inutile che te insiste a dir che “so ragazzi”, solo parchè fin desso i te ga portà via solo che la marenda, speremo che i te porte via anche l’auto cussi forse te se renderà conto che “so delinquenti”. Xa che son, ve lasso i vigili, no parchè i xe delinquenti, ma parchè xe quei che i dovessi vigilar su la nostra città, solo che anca lori noi ga la sicuressa del posto de lavoro: una volta i iera li de la Pretura, dopo i li ga spostadi dove che iera l’Enel, desso pararia che li mande dove che iera al Commissariato, i passa più tempo a impachetar e spachetar le robe che no a tender quei disgrassiadi che fa disastri. I unici che sa dove andar xe quei che se taca drio de la spassatrice e li i pitura a destra e a sinistra, e me sa che se i va vanti cussì, co tuti i schei che i tira su co le multe, fra un par de ani i li trasferisse al grand’hotel. Ve lasso la rotonda de l’Anconeta, rotonda par modo de dir parchè ogni giorno ghe xe i operai che sposta quei bidoni bianchi e rossi tal meso de la strada e un giorno xe una rotonda, un giorno xe un quadrato, un giorno xe un triangolo, probabilmente visto che al podestà xe un professor sta vedar che al vol insegnarne anca la geometria. Dato che son rivà fin lì, voio lassarve anca al semaforo de la pista ciclabile che traversa l’Anconeta. Quando che ti te son li fermo al semaforo che xe rosso parchè passa una bicicleta, dopo sinque minuti che te son ancora fermo, parchè no xe ancora vegnù verde, te pense che quel in bicicleta che xe passà sia stà un coridor in fuga e te pense che desso finalmente passarà anca al resto del Giro d’Italia, invesse no, prima che vegne verde fa ora passar anca meso Giro de Francia. Concitadini, ormai le go nominade e desso come fasso a no lassarvele, ebbene si, parlo proprio de le piste ciclabili, gloria de la magnadora e disperassion de tuti quei altri, e visto che son li vissin volessi parlarve del toco che passa de fianco l’Ospedal vecio, parchè i me ga dito che più che una pista ciclabile xe un campo minato e penso che savè de che mine che parlo. Bon, mi alora son andà dal podestà e ghe go parlà del problema e savè cossa che al me ga dito? Che xe colpa mia. “Come colpa mia” ghe go domandà, e lu, ciapandome soto brasso al me ga dito: “Caro Anzoleto, xe ani e ani che te vien in piassa e che te dise che le piste ciclabili le fa cagar, te ga visto, i te ga ciapà in parola.” E via lu che xe andà. Concitadini, mofalconesi e mofalconesi doc che volessi dir: de origine cabiba, volessi a sto punto prima de tacar co la musica, far una dedica: per un “Pupo” che xe andado e che saludemo, sta rivando un altro pupo, che al nasserà fra un mese e che al se ciamerà Morgan e co quel nome spero che al divente un pirata come so nono che saria mi. Maestro taca banda… |
|
 Autore del testo Gilberto Sgualdini |
|
|
|||