|
 |
Corteo degli sposi e testamento |
| Testamento 2007 | Martedì 20 febbraio 2007 ore 12.00 |
 Sior Anzoleto Postier |
Concitadini zovini e veci, mofalconesi indigeni e oriundi, so che no
xe bel presentarse in sta maniera el giorno de Carneval ma dopo
tanti ani ormai par mi al biscoto iera come un parente e iera tanto
più bel vederve stivadi ta quel biscoto che no sparnissadi ta sta
panadela. Xe do giorni che no me dago pase, da quando che ghe go
dito al saffer de portarme a far un giro par Mofalcon par renderme
conto dela situassion, cossa volè par strada me son anca distrato:
un saludo de qua, un bicer de là, un bicer de qua, un saludo de là,
un bicer de qua e de là, quando che go sentì che al se stava
fermando, go alsà la testa, me son vardà intorno e ghe go dito:
“Cossa te fa omo, cossa te se ferme, andemo dai, no te vede che semo
pena a Redipuglia.” “Anzoleto –al me ga dito- vara che semo in
piassa a Mofalcon.” “Ma come e el biscoto?” “Frantumà, roto” “E chi
xe stà?” “Al podestà” “Ciò in tuti sti ani ghe ne go visti de
podestà, ma come che ga roto sto qua, nissun!” Concitadini, la magnadora nostra xe sempre là, però, xe cambiada la magnadora granda, ga vinto Prodi parchè stavolta al ga studià l’avversario e al ga vinto perché el ga contà più bale de lù: mi sbasso le tasse, mi sbasso l’ICI, mi sbasso al deficit, l’unica roba che par desso al ga sbassà semo noi italiani, al ne ga sbassà tuti a 90 gradi. |
|
E cussì go capì che le elession xe come far l’amor: prima
ghe xe i preliminari parchè i te leca de qua e i te leca de là e
dopo i te lo para su che xe un piasser. Dopo al ga vudo problemi
par far al governo e alora lì ghe xe andà in aiuto al nostro
sindaco che ghe ga dito: “Romano, in ste condission, par far al
governo basta che te fassi una racolta diferenziata.” E li i ga
capì che noi semo un punto de riferimento par tuta l’Italia, par
cossa credè che i la gapi tirada cussi longa sta storia dei PACS,
i spetava che finissi i corsi de cusina, de lissia e de uncineto
che gaveva organisà par i omini la nostra sindachessa. Anca lori però ogni tanto i vien fora co dele ideone che no so come che i fa pensarle, par esempio me par che i vol che te paghe col Bancomat se te spende più de sento euri. La scuse sior ministro volaria farghe una domanda: se mi volessi passar una serata con una bela signorina che la me domanda più de sento euri, cossa fasso, ghe passo al Bancomat ta le culate? Gnanca l’auto che te ga no va ben, se te ga un auto vecia i te aumenta el bolo cussi se prima te podevi ver qualche pensier de cior una più nova desso no te vansa gnanca per ver el pensier, infati gavè visto che in sta piassa i ga messo un mucio de pai, li ga fati passar par lampioni, ma visto che luce noi fa i servirà solo par ligar le biciclete. A proposito de biciclete, dovè saver che desso per far al censimento de quanti Bangla che gavemo in città, i vigili fa un giro e i varda le biciclete che xe ligade tai pai, tai cartei, tai passaman, tai alberi, xa li te capisse parchè i magna tante sivole parchè par cadene e lucheti i spende xa un capital, insoma, te capisse che le bici rusini xe de quei che xe andai via, quele co le rode fiape xe de quei che xe andai via ma che i tornerà, quele pena piturade xe dei novi rivadi, quele pice xe dei putei, quele sensa sela, sensa roda o sensa manubrio vol dir che li vissin xe vegnu star qualche cabibo. Anca al ticket tal pronto socorso i ga messo, go visto un che ghe diseva: “La podessi incerotarme sto dito che me lo son sbregà taiando i legni pal fogoler?” “No xe un urgensa questa, la ga de pagar al ticket, la ga al Bancomat?” “Si, ma la me inceroti anca quel che la banca me lo ga pena sbregà parchè no go più un.” Concitadini, mofalconesi, popolo de scovassini adesso ve lasso anca mi un bel mucio de scovasse e dopo sarà afari vostri a meterle tai sacheti giusti. Go capì che ver un secondo lavor pol star ben ma far i scovassini e pagar par farlo no me tar tanto de furboni. Ve lasso la raccolta dele scovasse porta a porta, ghe ne go sentide de le bele, come quando che ghe go domandà a la veceta che sta vissin de mi cossa che la pensava del porta a porta, e cussì la me ga risposto: “Si me par che xe un ben forse, xe lavor, ma se pol rangiarse però una roba no go capì: le scovasse bisogna portarle zo noi o vien Bruno Vespa su a ciorle?” Go provado a domandarghe anche al cabibo che sta in condominio li de mi cossa che al pensava del porta a porta e al me ga risposto che semo restadi indrio co le carte parchè lori i xe gia al finestra-strada. Alora me son rabià e ghe go dito:”Cio omo no te pensarà miga de far cussì anca qua ara che te ga de portarle tal cassoneto” e al me ga risposto:”Perché si apre?” Iera articoloni sul Picolo chi diseva che xe ben, chi diseva de no, chi che voleva dar le dimission, al sindaco no ghe fregava niente parchè tanto lui me par che nol podarà più essar eletto e alora che se range chi che resta. A proposito del Picolo me xe vegnù in mente una roba: go capì perché co se parla del’Ospedal i mete la foto del’Ospedal, co se parla del Cantier i mete la foto del Cantier, però parchè co se parlava de scovasse i meteva sempre la foto de Pizzolito. Quei che iera favorevoli i diseva:”Parchè no va ben, ga pur Ronchi, ga pur Staranzan”. E li me par che i se sbagliava parchè sia Ronchi che Staranzan noi gaveva al porta a porta ma i gaveva el porta porta a Mofalcon. Anche se posso capir quei de Ronchi: i ghe gaveva messo le scrite par sloven. Dopo tuto sto si, no, no so, vedemo, forse, noi e digo noi, gavemo voludo al referendum e dopo, no semo gnanca andai a votar. Bela figura de merda che gavemo fato. Adesso dovaremo anca star atenti come che le butemo via le scovasse parchè guai se te sbaglie, i te mete el bolin rosso cussi tuti sa che te son un mona e no te son bon gnanche de butar via le scovasse. I podarà anca darte la multa e tratarte come un delinquente, che quasi quasi te convien darghe una sprangada in testa a quel che te sta metendo al bolin parchè visto come che va le robe in sto paese se te lo cope te son sicuro che noi te fa niente. Già me li vedo: dopo gli scandali e l’operazione “mani pulite”, dopo le intercettazioni e l’operazione “piedi puliti”, scatterà l’operazione “casso…neto”. I gaveva dito anca che se noi podeva far al porta a porta i doveva par forsa aumentar la tassa su le scovasse. Ciapa, se fa come che vol lori e le aumenta lo stesso. I ga dito che i devi farlo parchè paghemo un bianco e un nero e mi digo: visto che i xe za pagai, noi pol contentarse. Tanto mi son strigo e so come che andarà a finir: porta un sacheto ogi, porta un sacheto doman, son via de casa do giorni e se me disfa al sacheto in terassa, go sbaglià giorno, portilo zo co la piova, un bel giorno si alzerà dal popolo un unico grido di speranza: TORNA LUPERFIDO, col to carus sigando strassi, ossi, fero vecio che li mandemo tuti in mona. Concitadini, ve lasso l’ospedal, quel vecio ormai ruspada dopo ruspada xe stà cancelà dala guida Michelin dei clandestini, dei drogai e dele pantegane, ve lasso quel novo che xe ancora senza capo chirurgo che mi go un idea del perché xe anda via quel che iera, par mi xe stadi quei de l’Ospedal quei che xe sempre che i fa gite in giro par tuto, dopo che i ga visto che podeva render qualcossa sercando de ficarte le pignate tanto che te son in gita, i ga provà anca lori. Al primo colpo i ga da via al primario, al dotor Pignata. Ve lasso al Cantier che pararia che al sia pien de lavor co tante barche de far e co ghe penso me vien in mente mio nono che me contava sempre del cantier del tanto lavor e dela tanta fadiga. El me contava dele navi passegeri che i faseva e che dopo le partiva per i mari del sud, dele petroliere che i faseva e che dopo le partiva per i mari del sud, dele portaelicoteri che i faseva e che dopo le partiva per i mari del sud, ma dentro de lu al gaveva un sogno: far una grande nave, lungona e grandona, una porta-cabibi che la parti per i mari del sud. Dopo l’industria ve lasso anca al turismo, un pochi de problemi in Marina ghe xe: prima iera la costruzion del tubone, dopo iera la sabia che cedeva, dopo iera la sabia che mancava, dopo iera le scovasse che vansava, adesso pararia che sia torna al problema de l’acqua che no la xe più tanto neta, basta ver pasiensa prima o dopo i turisti torna, per adesso xe tornadi i stronsi ma basta no disperar. Ve lasso al solito camin dela central, i ga dito che quei fumi aumenta l’effetto serra, che fa aumentar le temperature, che disfa i giassi dele montagne, che fa aumentar l’acqua del mar, mofalconesi se va vanti cussi semo a posto, ancora 150 ani e dopo la central xe soto acqua e se gavemo cavà al pensier. Ve lasso anca sta roba qua sta p…, sta p…, me vien de dir de tuto meno che piassa, i gavarà speso soldoni par pagar quei che ga fato al progeto, quando che bastava andar li de Betela cior una cartolina de Redipuglia e copiarla e se spendeva anca meno de un euro. Ghe pareva bruto l’asfalto del biscoto alora i ga messo piere col color de eternit, ghe pareva brute le crepe su l’asfalto del biscoto xe sai più bele le crepe su le nove piere, iera bruto parchegiar intorno al biscotto xe tanto trendi invese farghe un capel de auto solo da una parte, che bruti che iera i baloni che faseva luce in piassa, no xe meio quela specie de lampade abronzanti che i ga messo da una parte, e i baloni? Par quei i ga messo le lucete soto le panchine cussi no te se li ciape tra una strica e l’altra. I ga speso tanti soldi poveri che adesso ghe toca taiar le spese par le manifestassion, no i podarà far la Città di luce, bela scusa eh, voio veder con che coragio metevi in pie Monfalcone città di luce co sto scuriot che gave fato. Però i dise che xe un bel saloto: accogliente, intimo, con le luci a creare atmosfere, e alora parchè ciamè la Croce rossa e la polizia se una baba se spoia in piassa. Se meritava podevi almeno spetar che la finisse. Concitadini, ve lasso la nova piassa, la nova fontana, al novo teatro, la nova sala de esposizion, anca al novo mercà pecà che ne xe restà al vecio podestà. Maestro…. No, no speta un momento. Cittadini devo far una comunicassion de servissio: domani tuti in piassa parchè xe de cior su i coriandoli, dividerli per tipo e dopo anche per color se no i ne mete al bolin rosso. Maestro taca banda che li mandemo tuti a ca….ntar. |
|
 Autore del testo Gilberto Sgualdini |
|
|
|||