|
 |
Corteo degli sposi e testamento |
| Testamento 2008 | Martedì 5 febbraio 2008 ore 12.00 |
 Sior Anzoleto Postier |
Concitadini zovini e veci, mofalconesi indigeni e oriundi, son rivà,
son rivà co la barcheta parchè desso come desso xe l’unica roba che spero ne fassi star a gala, e anche parchè, se no lo savè, sto ano xe la ricorrensa dei zento ani del Cantier infati gave visto che i operai i iera za in festa par le strade cui fis’cioti e cui tamburi, tanto che i ga anca fermà al podestà regional che tuto rabioso al ga dito che li denuncia tuti parchè lui al gà de lavorar miga de far festa come quei disgrassiai de cantierini. Lavorar? Forse pensando a cossa che i ga fato tal parlamento co la mortadela e al spumante e pensando che i vol far nove votassion par Pasqua, al gavarà vu de andar a cusinar ovi duri e taiar al salame, tanto la i lavora tantonon, te li vede che i lege al giornal, i telefona, i pisoca, i se conta barzelete e dopo i sbaglia come quel, mo… , quel mo…, quel malandrino, scusè ma no se pol dir altro parchè oltre che moni i xe anca offendini, che co iera de votar par la zona franca al se ga sbaglià parchè al iera distrato e iera tanta confusion e cussì gavemo perso tuto, che fossi casin forse al ga ragion, però parchè quando che i ga de votar par l’aumento de le so paghe i xe atenti come cani de punta? |
|
A proposito de punta, par l’ocasion dei zento ani, la diression
del cantier iera disposta a darne, par metar in piassa tipo
sopramobile, la punta de la nave che i sta fasendo; mi però son
andà dirghe che no me andava tanto ben parchè xe za quei de la
magnadora che i ne lo punta… alora ghe go proposto che vista
l’aria che tira, i podeva darne de metar in piassa un elica e
magari meterla anca in moto cussi i se rendeva conto de come che
gira le …pale a Mofalcon. Ghe go anca domandà se i farà una bela
festa par el centenario. “Sicuro –i me ga risposto- vegnerà anca
Napolitano” “Parchè no ghe ne gavè za bastanza!” ghe go dito.
Concitadini, femo do lagrime in memoria de la benzina de zona franca, ma proprio do lagrime parchè coi schei che gavemo de più no rivemo far, adesso se tornarà indrio, ai tempi che se andava a far benzina de là, a cior la carne de là, a far la spesa de là, un ga perfin dito: “Tanto val che andemo anca star de là, tanto no semo più l’ultimo confin d’Europa, desso semo i ultimi e basta.” Forse adesso dopraremo de meno l’auto, podaremo far dei bei gireti in bicicleta par le piste ciclabili, podaremo far anche dele bele caminade, come sposeti, man ne la man, pestando le merde de can. Concitadini, se no se gavè acorto ve lo digo mi: porca mastela xe cascà al governo. Se andarà de novo a votar però prima i ga dito che i vol cambiar al sistema de le votassion, sicuro i farà un altro bel casin, come coi referendum che co te ga de dir no te vote si e co te ga de dir si te vote no, cussi i xe sicuri che no te capisse niente, come che no ga de ver capì niente gnanca al podestà de Staransan. Spero no pensarè miga che parlo de le scovasse, ma per l’amor de Dio ormai se gavemo abituà a lavorar de più par meterle fora, a pagar de più par far noi al lavoro, a vedar Mofalcon cariga de sacheti de scovasse par le strade, parchè un giorno xe fora quei giali, un giorno xe fora quei rossi, un giorno xe fora quei verdi e ogni giorno xe fora le scovasse e basta. Xe tanto de quel lavor de far che i cantierini che a Nadal xe andadi in ferie a casa sua, par no ver pensieri i se le ga portade drio. L’unico problema xe le discussion e le barufe che vien fora in famea par dove che se ga de butar le robe, come quei che sta vissin de mi, che ogni tanto sento ela che fa:”Toni, dove buto sta roba? La buto tal suto? Toni, e questa dove la buto: ta la plastica o tal riciclabile? Toni,…e questa?”. Alora sinto lui che comincia a porconar, Pissolito de qua, Pissolito de la, fin che al tira un spudon ta le scovasse e al ghe dise:”Adesso butile ta l’umido, svelta però prima che le se sughe se no semo al punto de prima.” Concitadini, mofalconesi, ve lasso quel che posso, e posso lassarve al palasso de la magnadora che ormai anca lu comincia ver la creparia, credo che al se sia sbregà parchè i voleva darghe, come se dise, un novo luk e vista la moda del momento, penso che i voleva farlo tondo, come le rotonde che i ne ga sgnacà e i ne sgnacarà, solo che i ga speso un casin de bori e desso li ga curti anca lori. “Ciò –ghe go dito- podevi far de meno de magnarveli e giustarve el quartier.” “Come magnadi –i me ga risposto- gavemo rifato al palasso de la pretura” “Cagade” “Gavemo messo a posto al palasseto veneto” “Cagade” “Anca la biblioteca gavemo sistemà” “Cagade” “Cossa te pense che no gavemo fato ben i lavori” “No –ghe go dito- penso solo che co tuti sti lavori gave sfratado un casin de colombi che adesso scagassa par tuta Mofalcon.” Lavori, lavori, bei lavori, varda la piassa col so scuriot, “No xe vero che la xe scura” i diseva, però i se ga inacorto che forse qualche lusor più forte va messo e ve spiego mi al perché. Una sera iero che passavo per la piassa, tal scuriot, stando tento a no sbrissar o a insopedarme ta qualche bangla, quando che vedo vegnir fora dal palasso dove che iera al consiglio, Pissolito. Carigo de premura al monta in bicicleta e senza impiar la luce al ciapa e al parti, un momento dopo sento un ribalton, rumor de ferassa e de ossi par tera, me giro e… ciò nol gaveva ciapà in pien Konate che traversava la strada a pie, cussì i se ga acorto che forse xe vero che la xe scura. Lavor par lavor ve lasso anca al futuro sottopasso de San Pol e anca li discussion co la provincia, co le ferovie, mi passo sora e ti te passe soto. Bon alora mi passo soto però saria bon se mi passo sora e ti soto. No parchè me va meio passar sora e ti soto. Insomma sora-soto, soto-sora, vedarè che se troveremo col sottopasso che dentro gavarà al semaforo e le stanghe del treno. Concitadini, ve lasso l’ospedal come al solito con tuti i so problemi… primari. Xe ancora quel, no al xe più, forse al torna, comunque un problema xe stà spiegarghe a la veceta del mio condominio cossa che i voleva dir quando che la ga leto tal giornal el titolo “Pignatta sotto pressione”, parchè no la se dava pase che i fasesi barufa in sala operatoria per come cusinar co la pignata atomica. Però, ve devo dir che gavemo un ospedal dove che nassi un mucio de putei, in poche altre parti i partorisse come qua, e el reparto de ostetricia se ga sempre più specializado par assister le nove mame, infati par far sentir le partorienti come a casa, i ga messo ta la vasca par far al parto in acqua… l’acqua del Gange! A proposito de acqua go visto che a Mofalcon e anche tai paesi intorno i ga verto un mucio de quele boteghe par lavar i strassi cui getoni. Volendo saver come mai ghe iera tante de ste nove atività go fermado un de quei che sa tuto de tuto e de tuti e ghe go domandado se i verseva tute ste lavanderie parchè i faseva i quartieri pici e no stava più dentro le lavatrici. “Ma no –al me ga risposto- xe causa dei foresti” “E parchè?” “Parchè xe rivadi tanti del Bangla DASH”. Concitadini, ve lasso tuta sta gente de altre rasse che xe vegnuda qua e par impossibile che una dele prime robe che i ga imparà xe stà quela de domandar, chi voleva un quartier par metar in pie una associassion e cussi i ghe ne ga fate do o tre, chi ga domandà un quartier par far una moschea, adesso go quasi paura che i torne a piantar qua in piassa al fanal che i ga buta zo parchè qualchidun ghe ga domandà un totem. E no basta questi, se ga messo anca i furlani che signorsì bisogna studiar e parlar al furlan, parchè dai studi che i ga fato tuto risali al furlan anca al bisiaco. Infati secondo lori pararie che prima che rive qua i Cosulich le barche le faseva i muradori furlani co la malta e i madoni. Anche al sloven i voleva doprar, parfin tal falchet, gia me le vedo in consiglio comunal le discussion fra el furlan Frittitta e el sloven Piredda, l’ex assessor che forse al xe un poco istrian parchè per no comprarse al giornal i se lo ga portà in casa. Concitadini, no voio che pensè che dopo quel che go dito son rassista, parchè no xe vero: “Mi no son rassista xe tuti quei altri che no xe bisiachi.” E visto che mi son per la pace dei popolo savè cossa che ve digo: mestri, idemo, taca banda |
|
 Autore del testo Gilberto Sgualdini |
|
|
|||