Pro Loco Monfalcone

Concitadini zovini e veci, mofalconesi indigeni e oriundi, anche par sto ano se vedemo in questa bela piassa, cussi bela che parfin al palasso de la Comun al se sta girando par no vederla.
Concitadini, no gavemo capido gnente, critichemo sta piassa ma no gavemo capido che al podestà al ga fato far tuto sto lavoro per migliorar la nostra città, infatti, al ga fato cavar al biscoto par meterne una scatola de ciocolatini.
Ogi gavemo vudo al permesso de star sul balcon del palasso, solo noi. Lori no xe più qua, i xe stadi mandadi in pretura. Chi xe che ga dito iera ora. I li ga solo che spostadi spetando de giustar sto qua, che visto che schei i dise de no ver, forse i lo farà rotondo anche questo cussì i ciaparà i contributi. Comunque ta la ex pretura ghe xe uffici, impiegati, tecnici, dirigenti, assessori, tuti là, meno che un, si, manca proprio lù al Podestà, parchè lui ve digo mi dove che i lo ga messo, i lo ga messo li vissin, all’Istituto acustico Pontoni parchè pararia che nol sente niente de quel che dise la gente.
Lu nol senti gnanca quando che la gente brontola che in piassa no se vede niente co sti lumini de morto per ferai che i ga messo. Però, me par che forse qualcossa se move, pararia che quasi quasi forse i li cambie, par adesso ancora noi se fida parchè i ga paura che i ghe li freghi come quei altri, ma più vanti le robe pol cambiar, la central de l’Enel pol cambiar, al combustibile pol cambiar, quasi quasi dopro al nuclear, e cussì saremo noi cittadini che diventaremo come tante lampadine e dopo i te dirà: gavè visto che gavevimo ragion noi: Monfalcone città di luce.
E cussì visto che de l’Ospedal i vol serar cardiologia, terapia intensiva, e punto nascita, i serarà anca radiologia che tanto, par far i ragi basterà caminar par la strada.
Go nominado al problema dele nascite, parchè vien fora un mucio de question con al nostro capoluogo, i dise che Mofalcon deve serar al punto nascita, che lori xe al capoluogo de provincia che xe meio farlo là e cussì via, mi posso solo dir la mia sensa impegno però e questo lo pol anca confermar la me baba: Gorissiani, per salvar al punto nascita ghe xe solo una roba che dove far...GUAR!! E se no ghe la fè, procurè una casa, un lavor, quintalade de sivole e ve mandemo noi un squadron de cunini.
Concittadini, mofalconesi, e che i lo sapi anche quei che mofalconesi no xe. Mofalcon xe sempre sta de esempio e de ispirassion par tuti, anca quel filmon che xe de moda desso come al se ciama a si AVATAR i lo ga pensà vardando Mofalcon cossa credè. Tal film xe esseri blu comandadi a distansa da altri, bon qua xe sempre stà in cantier omini col terliss blu comandadi da altri; tal film la tribù se ciama NA’AVI, par forsa parchè la xe nata in cantier e quel posto come i lo ga ciamado: Pandora, ma no xe PAN…DORA, xe PAN…ZAN. E par vardar al film i ve da anca i ocialeti come i saldadori.
Speremo però che noi ciape ispirassion par far anca film de paura visto quel che i ga fat a la Marcelliana.
Mi no capisso però sti aministratori publici me par impossibile che i fassi le piasse sensa vardar soto, i fassi le rotonde sensa vardar soto, i vadi a babe sensa vardar soto, l’unica volta che i ga varda soto xe stado quando che i ga fato al sottopasso sensa acorserse che al casin iera sora co se sera le stanghe de Ronchi.
Eco che come al solito vien fora al discorso sui lavori publici no voio gnanca imaginar cossa che i ga intenzion ancora de far oltre che a spacar strade un giorno si e un giorno anca, sempre però co la bruta stagion parchè cussì un lavor che in quatro giorni xe finì, fra una piovada, una gelada, un temporal, al dura almeno quatro mesi. Una roba però so che noi farà: la moschea; parchè al nostro ga pensà: a Berlusconi co la statueta del duomo i ghe ga spacà la boca, e se dopo questi i fa la statueta del minareto a mi cossa i me spaca.
Ma no sta preocuparte tanto, parchè due mandati te ga fato adesso no so se se pol far anca al terzo comunque se te se candidi par el terzo mandato noi podemo anca far al primo mandemolo. Anca parchè ghe xe sempre qualche fatina che te pol far qualche striganza.
Concittadini, mofalconesi sento che devo lassarve ste quatro robe in eredità: ve lasso la spazzatrice, gioia e delissia del comun, castigo e dolor dei mofalconesi, sfogo dele vigilesse, no xe che i la manda in pension, pararia che adesso noi te daghe più la multa se te ga l’auto in strada co la passa, forse i se ga inacorto che i le neta cussì mal che anche se xe l’auto no cambia niente.
E cussì ve lasso anche le vigilesse, orfane de spazzatrice, che credo che le sarà impegnade in un corso organizado da la sindachessa parchè dopo verghe insegnà ai omini a lavar, stirar e cusir, adesso la sarà impegnada co la cusina visto che i ghe darà ai vigili al spray al peperoncino e forse luganeghe par manganel. No so se xe una bela idea quela del spray par combater la delinquenza e la droga, parchè se te ghe da una sprussada, te ghe suffie via tuta la polverina e alora i se rabia ancora de più e i te cortela.
Ve lasso la nova entrata de l’ospedal: i ga serado al porton del parchegio e i ga migliorado al servissio. Però ste tenti che se imbrochè l’entrata giusta se in pronto socorso, ma se te sbaglie, te son drito in capela.
Cussì ve lasso anca i semafori, purtroppo xe sempre quei che iera anche l’altro ano però l’assessor li sta ancora studiando per capir parchè ta qualche incrocio te son li che te spete e te spete al verde che nol vien mai, co te son a pie te vol venti minuti par andar dal Centrale a li de Deo, ma se i semafori i xe inteligenti, parchè proprio a noi doveva tocarne i piu moni.
Ve lasso la biglieteria fai da te de la stassion. Tuti in fila li a far al biglieto, te frachi boton e la comincia: dove la vol andar, quando, come, ha scelto giusto, meti i soldi, ciol el biglieto, speta el resto, oblitera… la saluto, arrivederci lei è stato proprio bravo… pecà che co te va fora al treno xe xa partì.
Ve lasso l’acqua che sarà privatizada, solo che ancora noi ga capido ben cossa che vol dir, infatti più de qualchidun no va più in privata per paura che la i ghe daghe acqua. Invesse quando che i parla de privatizzazioni vol dir solo che invesse de pagar quel che te paghe e che forse te tornarà qualcossa come servissi o struture, te pagarà de più, te gavarà meno servissi e qualchidun se ingrassarà a la facia tua. Come la television co sta storia del digitale, del skai, che fin l’altro giorno pensavo che fossi un televisor rivestido de pele, che te vede e no te vede, insoma xe una roba che te paghe par no vedar quel che adesso te vedeve gratis.
Volevo lassarve la scola, ma ormai xe restà cussi poco, adesso no i insegnerà gnanca più la geografia, ne tocarà tornar a divider al mondo a la furlana che volessi dir: di ca o di la de l’aghe.
Ve lasso par ultima la burocrassia del Comun de Mofalcon, dove che ghe par de essar una repubblica a parte, par ogni roba che te ga de far te deve girar a far carte par una setimana, ghe vol permessi de tuti i tipi, tante volte adiritura te par che i se inventi sul momento qualche nova regola, adesso par esempio i me ga dito che xe da tempo che i la ga coi cessi chimici: te vol cantar, te vol balar, te vol far festa, la domanda xe sempre quela: gavè al cesso?
E oggi che se qua in tanti, dove la fè sensa cesso, se tuti col catetere o col panolon? Secondo lori ogni volta che comincia una manifestassion ne vien voia de andar in cesso. Però me vien un dubbio, no xe miga che quei dei uffici che i se senti tanto acculturadi col teatro, co le galerie de arte, co le poesie che no capissi nissun e credo gnanche lori ma che fa tanto intellettual, i considera tute le inissiative che fa le associassion a Mofalcon dele cagade?
E alora gente, prima che se la femo indosso o che ghe la femo par tuti i cantoni, comincemo sta cantada che sto ano la xe anca su un CD par farghela imparar anche a chi bisiaco no xe, maestro taca banda che me scampa…