home     torna indietro

 

Martedì 8 marzo 2011 ore 12.00

Lettura del Testamento di Sior Anzoleto Postier Scritto da Gilberto Sgualdini Concitadini zovini e veci, mofalconesi indigeni e oriundi, semo de novo qua, par de no ma xe za passà un ano, stavolta però oltre che par al Carneval gavemo almeno altre do motivassion par far festa. La prima motivassion xe i festeggiamenti par i 150 ani de l’unità d’Italia e la seconda xe che al nostro beneamato podestà……(gesto con la mano). Concitadini, ma se pensè, 150 ani fa in mile i xe partidi e i xe andadi zo, dopo però pian pianin i xe tornai su tuti, e anca de più. Adess però ghe xe i studiosi in lavor par vedar se in quei ani iera partidi altri mile par al Bangla, visto al risultato che gavemo. Xe stadi ani de grandi cambiamenti, la piassa de tonda la xe diventada quadrata e le strade de longhe e drite le xe diventate curte e tonde, e la salita Granatieri diventerà discesa Granatieri visto che la sta franando, e pensar che i voleva doprarla par far le sfilate de moda come Trinità dei Monti, la Trinità che ocorera par farla star su: Pare, Fio e Spirito Santo. Una volta te zugave a pendul ris’ciando de ciapar un fraco de legnade se te spacave qualche vetro, adess basta che te lo ciame cricket e i te fa anca al campo. Dopo, ve ricordè i noni coi andava a tirar la pension e i ghe cioleva la passareta ai nipoti, adess invece xe le nipoti che ghe da la passareta ai noni. Concitadini, proprio tempo de cambiamenti, anche in politica, tuto cambia e se rinnova, i giovani avanza: Andreotti sempre là e Gigi Ros de novo qua. E ghe semo de novo a la politica, perché come che savè ben, fra un poco andaremo a votar e chissà, forse stavolta i ne farà votar col televoto come che ormai i fa par tute le robe, tuti se domanda come che se farà a saver i risultati, facile, ve digo mi che so, dopo al televoto ghe xe al… te le conto, che lori per contarle i xe dei fenomeni e anche stavolta sentiremo le solite monade parchè vedarè che come al solito vinserà tuti anche se nisun li vota, come che xe gia successo: ga vinto Pissolito ma a sintir in giro nissun gaveva votà par lu e cussì sarà, qualsiasi che vinse no ghe andarà ben a nissun e nissun gavarà votà par quel. Son curioso de vedar cossa che sarà boni de far quei che vegnarà, dopo che quei de prima xe stadi boni de tirar fora acqua dal mercà, quei de desso xe stadi boni de tirar fora acqua de la piassa, spero che i prossimi meti le man tal corso cussì forse gavaremo al centro… nautico. E visto che de acqua parlemo, metemoghe par vissin anca le terme che ormai le xe ridotte come un lavandin visto che i le dopra solo par lavarse le man e impinirse la boca. Acqua che credo i trovarà anca dove che i ga de scavar par la TAV, se podè imaginar, i ga dito che i ga de butar zo tochi de monte cu la dinamite, figureve cossa che pol suceder: al palasso de la Comun che sta su cul spudac al vegnerà zo, la salita Granatieri che se tien cu le radise de la gramegna la vegnerà zo e al nostro falchet se trasformerà in un Aquila. Vardè che robe, proprio mi, che me piase tuto altro, devo parlar de acqua. Xe che ormai xe pericoloso bevar parchè i te ritira la patente. Anca a mi i voleva ciormela l’altra setimana co me ga fermado i carabinieri e i me ga fato sufiar al balonsin. Ma i xe restadi malon: gnanca un gios de alcol. Alora i me ga domandà cossa che gavevo perché stavo andando a zig zag co l’auto. E mi ghe go risposto: “omo, mi son de Mofalcon” “Si – al fa – ma cossa centra” “Omo – ghe go torna dir – mi son de Mofalcon e prova ti girar par de qua co tute ste rotonde e te vedarà se no te vien fora imbriago anca ti!” Concitadini, speremo che ghe sia cambiamenti anche coi novi sessori, parchè quei de desso no xe che i ga vudo tanta fantasia, infatti, co xe andà via al nero, i ga ciolto una ancora più nera de lu, e saria anca bon che no i porte sfiga visto che co i ga comincià a dir che le scole publiche xe allo sfascio, xe vegnù zo un toco dela Duca d’Aosta e che no i sia tanto de brasseto curto come quel che al ga fato far al recinto par far corer i cani in via Fermi. Assessor i gaveva dito cani no cunini. Concitadini, cossa volè che ve lasso, tempi de crisi gavemo, volè che ve lasso l’ospedal? Crisona anca lì, co te va la te par de andar in pelegrinagio a la Meca. Volè che ve lasso al mercà, no ocori, par quel spetemo la dinamite de la TAV. Volè che ve lasso al palasso de la magnadora, ormai al xe come la grota de Lourdes, xe un miracolo che al staghi ancora su. Vole che ve lasso la piassa, bela roba, tuta smerdada de tiramole, de catrame e de cagole. Ve lassarò qualcossa altro, ve lasso la benzina che no xe vero che la cresse ogni momento anzi, la cala, sì la cala, infatti par i stessi soldi i ve da sempre de meno. Chi se ne frega ga dito un, ciogo l’auto a gas, bravo, cussi dopo che i benzineri sarà tuti falidi te scoreserà tal serbatoio par farla andar vanti. Ve lasso le stanghe de Ronchi, un lavoronon par far al sotopasso e dopo co te rive lì, te se trove in fila davanti quele stanghe che par impossibile ma tute le matine che te son tardi par andar a lavorar, le xe serade. E li go scoperto una roba: Ronchi ga i treni più lunghi del mondo. Noi finisse mai, se te conte i vagoni te ciape al sono, come co le pecore. A volte go anca al sospeto che le rotaie giri in tondo, come i trenini dei fioi, parchè te vede tre volte al stesso vagon. Ve lasso tuta la menada del decoder par la television. Par un ano i te ga scassado i bisi: ocio che desso cambiemo al sistema de trasmission, sta tento che fra un poco passemo al digitale, desso desso semo pronti, vara de essar a posto anca ti. E li via, tuti in giro par boteghe, par supermercati, par centri commerciali, in serca chi de una television nova, chi del decoder, e li te vedeve tuti sti omini, co la femena drio, che i studiava sti ordegni, naturalmente sensa capir un patacon, e dopo ciapadi da la gola de comprar te sentivi che i ghe diseva a la femena: “Cio cossa te disi za che semo te vol che compremo anca al DVD” e ela che rispondeva: “Parchè, te pense de dormir meio col DVD”. Parfin la protession civile i gaveva messo in alarme par darghe una man ai più ansiani. I gaveva dito che no ocoreva far niente, bastava tacar al ciosul ta la spina e ta la television e tuto andava avanti sol. Co xe finalmente rivà al momento, basta, no se ga visto più niente, ma che i vade a remengo, par ver le notissie del TG go dovù sorbirme Emilio Fede par do mesi. Ve lasso anca i mofalconesi fioi de nissun. Go scoperto che i residenti de Mofalcon xe quei fin a l’Anconeta e quei fin via Valentinis quei fora de li nisba. Quei ghe toca pagar al parchegio come se i vegnissi de Firense. No voio essar fastidioso ma forse quei gavessi più dirito de pagar de meno visto che se i ga de far un certificato o i ga de andar pagar qualcossa in banca i deve par forsa vegnir in centro anche se no i vol, e po quei del centro che va lavorar fora no xe che i lassa l’auto lì parchè i paga de meno e magari i va in cantier a pie, e in centro adesso vedo solo tanti bangla e se no ve gavè inacorto, quei xe in bicicleta. Meditate assessori, meditate. Adesso finisso e fasso una roba che no go mai fato, maestro voio dedicar una canson sia a chi che ne ga lassà… ciao Albano e sia a chi che ne sta lassando… ciao Pissolito però bisogna che la sonè forte cussi forse al se sveia, e xe quela canson che fa: “è arrivato l’ambasciatore…” sveiete omo Maestro taca banda

 

inizio pagina     home     torna indietro